Rownd a rownd

 

A dyna ni. Y Dolig a’r flwyddyn uffernol honno drosodd. ’Da ni di gadael un Undeb ond yn dal yn gaeth i un jingoistaidd arall. A dw i newydd ddal i fyny ar gyfweliad sobreiddiol Dewi Llwyd efo’r Athro Richard Wyn Jones o Oslo a Chaerdydd, lle mae’n rhagweld “rhyfel diwylliannol ehangach ym Mhrydain rhwng y dde a’r chwith rhyddfrydol” o safbwynt perthynas yr Alban a’r Undeb a hyd yn oed dyfodol y BBC (lleihau’r arian i’r Gorfforaeth Ddarlledu, dileu’r drwydded, gyda goblygiadau difrifol i S4C).

Ond dw i ddim am ymdrybaeddu dan y felan. Yn hytrach, ymhyfrydu yn y ffaith bod un o’m hoff Ewrogyfresi’n ôl ar ein sgriniau. Ydy, mae’r wythfed gyfres o’r clasur Ffrengig Spiral (Engrenages) ymlaen ar BBC Four bob nos Sadwrn. Ar olaf un hefyd, wedi pymtheg mlynedd. Ond da ni’m isio meddwl am bethau trist felly rŵan.

Diweddglo hapus i Gilou et Laure?

Peidiwch da chi â disgwyl llawer o olygfeydd ystrydebol o’r Paris twristaidd yma. Yn hytrach, Paris yr ymylon, lle mae heddweision llwgr yn y clinc, cyfreithwyr yn hapus i gael cildwrn, pentref pebyll digalon y digartref dan drosffyrdd llawn graffiti, a’r gymuned Ffrengig-Arabaidd yn berwi o densiwn. Ydy, mae’r hen ffefrynnau yma’n rasio rownd strydoedd perig yr 18^e arrondissement fel Les Keystone Cops yn eu Clios tolciog a’u Golf GTE secsi, yn mynd yn groes i’r graen awdurdodol ac yn caru a checru eu ffordd drwy fywyd. 

 

Josephine, Laure & Souleymane y Morociad ifanc

 

A dw i’n edrych ymlaen yn fawr at weld beth fydd tynged y cariadon anghymarus Capitaine Laure Berthaud (Caroline Proust) a’r Lieutenant Gilou Escoffier (Thierry Godard) wrth i’r olaf gael ei ryddhau o’r carchar yn ei henw hi mewn achos o flacmel ar ddiwedd y gyfres ddiwethaf – ond sy’n gorfod ymatal rhag cadw mewn cysylltiad fel rhan o amodau’r barnwr. A gaiff y gochen ddadleuol Joséphine Karlsson (Audrey Fleurot) getawê efo pethau eto? Da ni’n sicr yn gweld ei hochr ddynol bob hyn a hyn, wrth iddi geisio achub y Morocan ifanc Souleymane rhag cyffurgwn yr isfyd a rhoi llety i’w chleient Lola mewn achos o dreisio. A fydd y Capten Amrani ifanc uchelgeisiol (Tewfik Jallab) yn llwyddo i gadw’i ben wrth fod yn bartner i Laure fyrbwyll? A tybed oes yna ramant yn blaguro rhwng y prif gopyn Beckriche a Barnwr Bourdieu? Tydi sgwenwrs Spiral heb fod yn glên iawn i gariadon yn y gorffennol, rhwng saethu’r pishyn Pierre yng nghyfres pump a lladd Samy mewn bom swyddfa’r heddlu yng nghyfres pedwar. Sori i bawb sy’n dechrau binjo o’r dechrau’n deg gyda llaw!

Yn wahanol i’r tro diwethaf, mae’r gyfres gyfan eisoes ar gael ar iPlayer ond dw i’n trio ’ngorau glas i beidio ildio i’r demtasiwn a sawru bob pennod yn fyw ar nosweithiau Sadwrn gyda botel o goch.

Mae'n gyffrous, yn amlweddog, yr iaith Ffrangeg yn byrlymu, ac yn llawn cymeriadau dw i wir yn malio amdanyn nhw serch eu ffaeledddau. 

Mon dieu, mae’n dda.

Y 'dream team' gwreiddiol

 

 

 

 

 

 

 

Ewropa

Arvingere - Lleifior Denmarc

Aeth 31 Ionawr heibio gan adael cawl potsh o emosiynau yn ei sgil. I mi, teimlad o dristwch, dicter, dryswch, ac ie, yr ystrydeb Gymreig honno o hiraeth. Hiraeth am rywbeth saff a sicr a gymerais mor ganiataol gydol fy oes. Diolch byth, felly, i BBC Four, Netflix a Walter Presents (hefyd ar S4C Clic gydag isdeitlau Cymraeg) am fy mhasbort parhaol i ddramâu tan gamp o dir mawr Ewrop. Dw i'n pasa trefnu gwyliau gwanwynol â naws ditectifs drama. Gyda thocyn awyren rhad (sori, Greta) a llond llaw o kronor, gobeithiaf ddianc rhag jingoistiaeth anochel gŵyl banc Mai yr 8fed yn Great Brexitshire, a mynd i’m hoff ranbarth a enwyd gyda'r hapusaf yn y byd - Sgandinafia. Os na fydd COVID19 yn rhoi’r farwol i bethau. Y tro hwn, de Sweden sy’n galw, a dinas glan môr Malmö sydd mewn lleoliad tsiampion ar gyfer gwibdeithiau 30km i'r gogledd i Copenhagen a 60km i'r de i Ystad.

Ystad, swydd Skåne, a ddaeth yn enwog diolch i un ar ddeg o nofelau Henning Mankell am y ditectif pruddglwyfus Wallander. Cefais fy hudo’n lân gan yr addasiad teledu Swedeg rhwng 2005 a 2013 (a’r fersiwn Saesneg ddiweddarach gyda Syr Ken Branagh) ymhell cyn i’r guardianistas ddarganfod ‘nordic noir’. Mae'r golygfeydd o’r caeau hadau rêp melyn llachar, yr adeiladau fferm fframwaith coch a’r traethau unig lle’r âi Kurt a Jussi ffyddlon am dro hir dan awyr lwyd ddiderfyn, wedi’u serio yn fy nghof. Roll on fis Mai! Mae gan y Swediaid sawl ‘hit’ isdeitlog yn eu meddiant, yn enwedig Bron / Broen (2011-2018) ysgubol a gynhyrchwyd ar y cyd â'u cymydog-weithiau-gelyn o Ddenmarc. A bydda i’n dilyn ôl troed Saga Norén - neu ei Porsche 911S olewydden yn hytrach - dros yr enwog Øresund sy'n pontio’r ddwy wlad, â’r gân iasol honno yn troi a throsi yn fy mhen. Ond y llwyddiant digamsyniol diweddar oedd The Truth Will Out (Det som göms i snö) ar Walter Presents), drama ddirgel seicolegol yn seiliedig ar stori wir (coeliwch neu beidio!) am griw sy’n agor hen achosion gwaedlyd yn sgil honiad newydd ysgytwol wrth i’r llofrudd cyfresol adael carchar. Gyda'r ditectif trwblus Peter Wendel (Robert Gustafsson) yn arwain criw bach anghymarus, mae’n ras yn erbyn y cloc wrth i’r drwgweithredwr beryglu un o weinidogion llywodraeth Stockholm. Ac oes, mae yna olygfeydd llawn eira.

Cafodd y Daniaid hwythau glod a bri byd-eang byd diolch i dditectif benywaidd galed mewn siwmper Ffaroeaidd (Forbrydelsen 2007-2012) a llywodraeth glymblaid â lampau secsi (Borgen 2010-2013). Ffefryn personol arall oedd saga fodern am frodyr a chwiorydd cecrus yn dychwelyd i blasty blêr y teulu wedi marwolaeth eu mam, arlunydd o fri cenedlaethol. Roedd Arvingerne (The Legacy, 2014-2017), a welwyd ar Sky Arts prin ei sylw, yn llwyddo i ’nghyfareddu a’m llethu bob yn ail diolch i ambell gymeriad a phlot ffuantus. Hynny, a’r credits agoriadol crefftus i gyfeiliant swynol Nina ‘The Cardigans’ Persson.

Dyma flas ar uchafbwyntiau dramatig eraill yr UE:

Belgique O wlad Tintin y daw La Trêve (The Break, 2016-2018) am y ditectif o Frwsel Yoann Peeters sy’n dychwelyd (yn annoeth) i'w wreiddiau yn ardal wledig yr Ardennes - lle mae ymchwiliad i farwolaeth pêl-droediwr ifanc addawol o Affrica yn arwain at bartïon S+M ar fferm leol, llond coedwig o gyfrinachau a phenaethiaid heddlu llwgr.

Catalunya Tro bach i Barcelona fodern yn Nit i Dia (Night and Day, 2016-presennol), wrth i'r patholegydd fforensig priod Dr Sara Grau sy'n archwilio i gorff arall ddarganfod iddi gysgu gyda’r llofrudd posib. Gyda mwy o droadau na'r A470 rhwng Dolwyddelan a Betws.

Česká republika Cyfres fer Hořící keř (Burning Bush, 2013) dan law’r cyfarwyddwr Pwylaidd o fri Agnieszka Holland (ffilm Mr Jones), wedi’i gosod ym Mhrâg dan oresgyniad y Sofietiaid, reit ar ôl i Jan Palach, myfyriwr 20 oed, ladd ei hun yn wenfflam ar Sgwâr Wenceslas ym mis Ionawr 1969. Darlun dirdynnol ond cwbl hanfodol o’n hanes modern ni, sy'n ein hatgoffa pa mor bell rydyn ni wedi camu ymlaen fel cyfandir.

Deutschland Yn gyfres noir afaelgar o’r 1920au, mae Babylon Berlin (2017-2020) yn cynnwys ditectif sy’n dioddef o PTSD a theipydd sy’n ysu i ymuno â’r heddlu, gan ddatgelu byd o gyfrinachau peryglus ar y lefel uchaf wrth daro ar draws cylch porn tanddaearol. Gwledd i'r llygaid sy’n portreadu tlodi truenus a rhemp sin gabaret Gweriniaeth Weimar.

Éire Llwyddodd cyfres gyffrous, bum rhan, yn yr iaith Wyddeleg, An Bronntanas (The Gift, 2014) gyda sblash o hiwmor tywyll i ddenu fy sylw ar wefan TG4. Hanes criw bad achub tlodaidd o Gonamara sydd mewn picil moesol ar ôl darganfod cyffuriau gwerth €1m gyda dynes sy'n gelain ar fwrdd cwch a drawyd gan storm. Peidiwch â sôn am y rygbi ...

France Keystone Cops Ffrengig, gyda chyfreithwyr a heddweision yn baglu o un penderfyniad gwael i’r llall - yn eu bywydau personol a phroffesiynol - mewn Paris prin ei chyffwrdd gan Insta-dwristiaid. Gyda chyfres olaf un o Engrenages (Spiral, 2005-presennol) ar y gweill, dwi’n edrych ymlaen at weld sut fydd pethau'n gorffen i’r cariadon anghymarus Laure a Gilou, y femme-fatale fflamgoch Joséphine a grand-père mabwysiedig pawb, y Barnwr François Robin.

ĺsland Daw Andri Olafsson, pennaeth heddlu mwyaf blewog Ewrop heb os, i’r adwy yn Ófærð (Trapped, 2015-presennol), ar ôl darganfod corff-heb-ben ar fferi sy’n sownd mewn tref borthladd anghysbell. I waethygu pethau, mae eirlithrad yn bygwth y dref ym mhellafoedd gogleddol Gwlad yr Iâ. Roedd yr ail gyfres yn chwarae politics, gydag eithafwyr asgell dde yn peryglu gwleidyddion a gwerin gwlad fel ei gilydd. Antidot iasol perffaith i'n gaeafau soeglyd ninnau.

Italia Efallai fod BBC Four wedi mopio braidd gyda'r arolygydd smala Montalbano, ond dwi heb fy argyhoeddi. Mae’n well gen i Non uccidere (Thou Shalt Not Kill, 2015-presennol) Walter Present, wrth i’r ditectif Valeria Ferro ddefnyddio ei chweched synnwyr i ddatrys troseddau yn ninas ysblennydd Torino wrth frwydro yn erbyn gwewyr personol pan ddaw ei mam allan o’r clinc. Doedd y firws heb daro yma eto.

Nederland Ar gyfer cyfresi iaith Iseldireg, rhowch gynnig ar Overspel (The Adulterer, 2011-2015) am ffotograffydd proffesiynol Iris van Erkel-Hoegaarde (ceisiwch ddweud hynny ar ôl ambell Witbier) sy'n cwympo dros ei phen a’i chlustiau mewn cariad ffwdanus â’r twrna priod Willem Steenhouwer, y mae ei deulu-yng-nghyfraith yn ymhél â chytundebau busnes amheus a chorff yn y gamlas.

Norge Iawn, efallai dyw Norwy ddim cweit yn aelod-wladwriaeth yr UE ond mae’n llwyr haeddu cydnabyddiaeth yma. Os ydych chi'n dyheu am aeaf go iawn, Wisting (2019) amdani lle mae’r cawr mwyn o dditectif a'i boen-yn-tîn o ferch o newyddiadures yn brwydro trwy luwchfeydd mawr i ddal llofrudd cyfresol. Draw ar Netflix, mae Okkupert (Occupied, 2015-2020) wedi'i gosod yn Norwy’r dyfodol agos sydd dan feddiant y Rwsiaid, yng nghanol argyfwng ynni’r byd.

Lle rois i ’mhasbort gwin coch ’dwch?

Diolchgarwch dramatig

Mae’n dymor diolchgarwch i’r capelwrs o’ch plith, cyfnod traddodiadol i ganu “deuwn ger dy fron yn awr” i ddiolch am y cynhaeaf, a sawl set fawr wedi’i haddurno â basgedaid o ffrwythau, llysiau a bara beunyddiol. Ac mae’n gyfnod ffrwythlon iawn i ni Lygaid Sgwâr hefyd. Rŵan, dwi ddim yn foi cymdeithasol ar y gorau ond mae’r myrdd o gyfresi newydd ma’n fy ngwneud i’n fwy o feudwy na’r arfer.

Mae nosweithiau Sadwrn eisoes yn sanctaidd, gyda seithfed cyfres ddrama Spiral, allforyn gorau Ffrainc ers Cantona. Os ydych chi’n gobeithio am ddelweddau neis-neis o boulevards coediog a chafé-bars chwaethus dan gysgod tŵr Eiffel, fe gewch eich siomi. Achos Paris ar y cyrion sydd yma, llawn blociau fflatiau di-raen, iardiau sgrap, haid o hwdis Arabaidd a duon, traffickers rhyw a wardeiniaid carchar sy’n sleifio hash gyda’ch baguette boreol. Ac yn eu plith, uned yr heddlu sy’n sgrialu rownd y lle mewn Clios tolciog pan nad ydyn nhw’n diawlio neu’n boncio ei gilydd cyn dychwelyd i’r gwaith oriau’n ddiweddarach â rhyw agwedd je ne sais quoi. Mae’n gyffrous, yn emosiynol (da chi wir yn ’nabod ac yn malio am y cymeriadau – gweler perthynas dymhestlog Laure a Gilou, neu un gynnes Laure a’r Barnwr François Roban) ac yn agoriad llygad i system gyfiawnder gymhleth, weithiau llwgr, Ffrainc. Yn gydgynhyrchiad rhwng Canal+ a BBC Four, mae’n enghraifft brin o gydweithio Eingl-Ffrengig ac rhagori ar lot o bethau Saesneg-yn-unig. 

Tybed ydi Boris yn gwylio?

Nos Sul wedyn, mae dogfen a drama’n cyd-daro am naw o'r gloch. Draw ar BBC Two, mae gynnoch chi The Americas with Simon Reeve gyda’r awdur a’r ecolegydd brwd. Ac fel cyfresi blaenorol o Rwsia, Iwerddon, Awstralia a Môr y Canoldir, does ganddo ddim ofn dangos y drwg yn ogystal â’r da. Rydyn ni eisoes wedi cael gwledd i’r llygaid ac ambell ’sgytwad - o ddadmer difrifol rhewlifoedd Alaska i argyfwng cyffuriau dinas lewyrchus Vancouver; yr heriau o fod yn gowbois-ffermwyr Montana ac ailgyflwyno’r byfflos ac eryrod aur i’r gwyllt, a diwydiant carchardai Colorado mewn gwlad lle mae cyfwerth â chwarter holl boblogaeth y byd dan glo. Cyfres sy’n ategu’r ffaith ’mod i’n hiraethu am rywbeth tebyg yn y Gymraeg. Yn eironig, roedd S4C yn ailddarlledu Gwanas i Gbara (2010) yn hwyrach yr un noson. 

Ar BBC One wedyn, dilynwn hynt a helyntion tri pherson ifanc ar drothwy’r Ail Ryfel Byd a thu hwnt yn World on Fire wrth i’r goresgynwyr Natsïaidd newid eu byd am byth. Cyfres berffaith, byddech chi’n tybio, i’r brexitiaid sy’n synfyfyrio’n orgasmig am bopeth Ymerodrol Churchillaidd ar hyn o bryd - ond cyfres sydd hefyd yn pwysleisio brwydrau’r Pwyliaid yn erbyn eu goresgynwyr ciaidd. Wedi’i ffilmio’n Manceinion a Prâg, mae manylion ffasiwn y cyfnod a’r ffasiwn lanast yn rhyfeddol, a’r straeon personol yn torri calon rhywun serch y darnau Mills a Boonaidd ar brydiau, a Sean Benn bron yn wawdlun o yrrwr bws dosbarth gweithiol gogledd Lloegr.

Nos Lun a nos Fawrth, cyfres dditectif newydd sy’n galw gyda deryn syndod o brin –drama o’r Ynys Werdd. Alla i ddim cofio’r tro diwethaf i mi wylio drama Saesneg o Iwerddon, heblaw Jack Taylor efallai gyda’r sgotyn Iain Glen yn chwarae rhan y cyn-garda alcoholig o Galway. Mae The Dublin Murders yn seiliedig ar nofelau poblogaidd (meddai amazon) Tana French, gyda’r heddlu ar drywydd llofrudd balerina ifanc wedi’i gadael wrth allor garreg hynafol mewn coedwig ger y brifddinas (as iŵ dw) yn 2006, pan oedd y 'Teigr Celtaidd' ar dân. Ac fel pob stori dditectif gwerth ei halen ystrydebol, mae gan y lleoliad ryw ystyr hanesyddol poenus i’r ditectifs Cassie Maddox (Sarah Greene) a Rob Riley (Killian Scott). Serch fersiwn y Gorfforaeth Ddarlledu Seisnig, mae’r actor Killian Scott yn mynnu bod yna deimlad Dulynaidd i’r cyfan - er bod cryn dipyn ohoni wedi'i ffilmio dros y ffin ym Melffast.

"As for the version of Dublin that is portrayed, we see tightly-knit small communities completely unravel due to a local incident, in this case a murder. That element was particularly Dublinesque for me...  the show also doesn't romanticise Dublin, it shows the gritty, dark underbelly of the place... there is also this mythical quality to Dublin Murders, there is an ominous presence, you start to get this idea that these woods are somehow alive”.

Dw i’n edrych ymlaen yn fawr iawn at y Craith Gwyddelig hon.

’Sdim modd osgoi Siapan ar hyn o bryd, rhwng rhyw dwrnamaint chwaraeon a rhaglenni di-ri gyda Gareth Rhys-Owen, Sue Perkins a Joanna Lumley. A bydd cywaith arbennig rhwng BBC Two a Netflix ymlaen bob nos Iau sy’n ennyn chwilfrydedd – thriller rhyngwladol Giri/Haji (“Dyletswydd/Cywilydd”) sy’n pontio Tokyo a Llundain. Ynddi, mae’r ditectif a’r dyn teulu Kenzo (Takehiro Hira) yn hedfan i Brydain i chwilio am ei frawd gyda chymorth Sarah (Kelly Macdonald) o Heddlu'r Met, ond mae’r personol a’r proffesiynol yn cymhlethu pethau wrth i’r ddau ddisgyn dros eu pen a’u clustiau mewn rhyfel gangiau. Un arall sy'n swnio'n hynod ddifyr, a bydd y metropolis neon yn siwr o ychwanegu lliw a bwrlwm i'r cyfan.

Où est Spiral?

Mae’r BBC wedi mynd yn rhy bell rŵan. Yn ein cadw ar binnau, a’n herian efo hysbysebion o’r gyfres ddrama am dditectifs honco Paris - Spiral, neu Engrenages i chwi Francophiliaid. Mae’r Ffrancwyr lwcus wedi gweld y seithfed gyfres ers mis Chwefror - ie CHWEFROR - a ninnau i fod i’w chael rhywbryd cyn Dolig. Nadolig eleni, gobeithio. Achos byth ers i’r gyfres hynod ddu o Ddenmarc orffen wythnos diwethaf, dw i wedi bod yn tyrchu drwy’r Radio Times am gadarnhad. ’Sdim sôn amdani’r wythnos hon na’r nesaf beth bynnag, gyda ffilm Sbaenaidd gan Pedro Almodovar a ffilm hanesyddol o Norwy’r 1940au yn hawlio slot naw o’r gloch nos Sadwrn BBC Four. 

Mynadd! Anturiaethau a charwriaethau rhemp Laure Berthaud a Gilou Escoffier ry’n ni eisiau ei weld, heb son am yr arch-gynllwynwraig bengoch Joséphine Karlsson sydd bellach dan glo am ladd ei threisiwr, a’r barnwr doeth Francois Roban sy’n raddol ddirywio o ran iechyd. Mae’r trelyrs yn awgrymu ei bod hi’n ta-ta Tintin wrth i’r hen dditectif gael ei glwyfo gan ei ysgariad a’i ddadrithio gan ei bartneriaeth hir oes â Gilou a Berthaud. A beth ydi hanes babi Romy erbyn hyn, wedi i’r fam newydd Berthaud sgrialu mewn panig o’r ’sbytu rhag tedi bêr panda anferthol Gilou a chyfrifoldebau teuluol ar ddiwedd cyfres chwech? 

Dw i’n gobeithio, yn gweddïo, mai Hydref y deuddegfed fydd y première...

Yn y cyfamser, mae yna ddigon o gyfresi tramor i’ch cadw’n ddiddig, diolch yn bennaf i wasanaeth ffrydio ardderchog Walter Presents.

The Lawyer (Advokaten) - un arall o stable Frans Rosenfeldt, sydd heb cweit lwyddo i gyrraedd uchelfannau The Bridge eto (a gorau po leiaf ddwedwn i am ei gyfres Brydeinig Marcella ar ITV). Cyfres deg pennod am dwrna ifanc o’r Frank a’i chwaer drwblus a’r blismones Anna, sydd mewn dyfroedd dyfnion iawn ar ôl dod wyneb yn wyneb â’r prif droseddwr fu’n gyfrifol am osod bom dan gar eu rhieni flynyddoedd maith yn ôl. Gyda chyffro, cymhlethdodau a digon o olygfeydd o’r Bont eiconig rhwng Malmö a København!

Guardian of the Castle (Čuvar Dvorca) - cyfres o Groatia y tro hwn, y brifddinas Zagreb yn benodol a thriller gwleidyddol o ganol yr 1980au mewn oes pan oedd Gweriniaeth Ffederal Sosialaidd Iwgoslafia yn dal ar fap y byd. Hanes Boris Biscan, dyn unig yn ei chwedegau, biwrocrat mawr y blaid sy’n dal i warchod y gorffennol a’r wladwriaeth i’r byw mewn byd modern sy’n prysur geisio’i ddisodli - yn llawn sbïwyr Traws-ewropeaidd, saethwyr cudd, ffasiynau uffernol a chymeriadau-smocio-fel-stemar. Mini-gyfres pedair pennod yn unig, yn ddelfrydol i’w mwynhau mewn dim o dro.

Thou Shall Not Kill (Non uccidere) - yr Eidal sy’n galw’r tro ma, a dinas bictiwresg Torino sy’n gymaint o gymeriad ynddo’i hun, diolch i’r gwaith camera godidog - gydag amgueddfa’r Mole Antonelliana yn tyrru dros y ddinas, a’r Alpau yn y cefndir - heb sôn am bencadlys baróc y polizia lleol sy’n gartre i Valeria Ferro (Miriam Leone). Wrth gwrs, mae ’na lofruddiaethau i’w datrys hefyd heb son am strach a stryffig personol gan gynnwys cysgu efo’r bos. Un o gyfresi mwyaf chwaethus eleni, heb os, wedi’i phecynnau mewn penodau awr a hanner yr un.

Draw ar netflix, mae yna berl o thriller Daneg. Hanes heddwas Asger Holm (Jakob Cedergren) fu’n hogyn drwg ar y ffrynt lein, ac sydd wedi’i neilltuo i uned galwadau brys København øst wrth aros am ei achos llys. Ac yno mae’r ffilm wedi’i leoli am 85 munud gron gyfan. Na, peidiwch â jibio, mae’n wir werth sticio iddi. Mae rhwystredigaeth ei shifft ddiflas o ateb galwadau gan foi off ei ben ar gyffuriau neu feiciwr wedi cael codwm meddwol yn prysur droi’n un llawn tensiwn, a ninnau ar binnau gydag e, wrth i Asger dderbyn galwad gan fam ifanc sy’n dweud iddi gael ei herwgipio o’i chartref a’i phlant bach. Mae’r cloc yn tician, y seibiau'n boenus, ac Asger yn dibynnu ar lygaid a chlustiau eraill wrth i ddifrifoldeb y sefyllfa ei daro - gan dorri’r rheolau a llusgo eraill i weithredu drosto. Ond dyw pethau ddim cweit fel maen nhw’n ymddangos, ac mae’r diweddglo’n dorcalonnus. Fe welais i hon mewn un eisteddiad ar fws blinderus o Lundain i Gaerdydd, a wir, fe hedfanodd y siwrnai.  The Guilty ydi’i henw gyda llaw, ac mae Hollywood am ei haddasu gyda Jake Gyllenhaal wrth y llyw. 

Fydd honna ddim hanner cystal. Da chi, gwyliwch y gwreiddiol.

Drymlwythog o ddramâu

Blwyddyn newydd, cyfresi newydd. A ’wannwl dad, mae yna gymaint ohonyn nhw dw i wedi gorfod chwynnu’r hen focs Sky+ er mwyn gwneud lle i gyswllt-cyfresi newydd. Mae gen i dri llyfr ar waith fel mae hi – 100 Lle i’w gweld cyn Brexit Aled Sam, Stalin’s Ghost Martin Cruz Smith, Myfi, Iolo Gareth Thomas. A dw i ar dân eisiau prynu Porth y Byddar Manon Eames a gafodd glod a bri gan darllenwrs Y Silff Lyfrau ('blaw Catrin Beard) yn y ciw hefyd.

Dyma’r uchafbwyntiau fesul noson, sy’n help garw i gadw rhywun yn y tŷ gydol fis Ionawr sych a thlawd:

Nos Sadwrn - ydi, mae’r diguro Spiral yn byrlymu mynd ar BBC Four am ddwy awr, ond mae BBC One yn cynnig rhywbeth go flasus hefyd. Hard Sun, drama ias a chyffro â sawl tro diddorol yn ei chynffon, gyda ditectif yn ymchwilio i dditectif arall, hacwyr a sbïwyr M15 a wnaiff unrhyw beth i gadw cyfrinach ofnadwy dan eu belt - sef mai dim ond pum mlynedd sydd gan y ddynoliaeth tan y bydd y ddaear yn llosgi’n golsyn. Mae’n symud ffwl pelt, yn hynod dreisgar ar brydiau a sili ar adegau eraill (blychau ffons BT yn Llundain unrhyw un?) a pherthynas afaelgar rhwng y ddau brif actor, y cyn fodel Agyness Deyn a Jim Sturgess sy’n trio braidd rhy galed i fod yn geezer. O, ac mae gan ein Owain Arthur ni ran fechan ynddi hefyd.

Nos Sul - mae heno’n boncyrs. McMafia ar y Bìb, fersiwn ddramatig o lyfr ffeithiol Misha Glenny, gyda James Norton (Bond posib?) yn chwarae rhan brocer ariannol sy’n ceisio’i orau glas i gadw ar y llwybr cul fel aelod o deulu o Rwsiaid alltud yn y Ddinas - cyn methu’n rhacs wedi ymosodiad ciaidd ar ei ewythr hoff, a chael ei sugno i fyd troseddu rhyngwladol. Mae hon at fy nant i, fel cyfres fyd-eang sy’n gwibio o Lundain i Foscow, Prague a Tel Aviv hyd at Ynysoedd y Cayman, ac yn darlunio bywyd bras y gangstyrs law yn llaw ag uffern y diwydiant masnachu pobl. Draw ar ITV, mae wythfed cyfres o Vera mor draddodiadol â chinio Sul, y golygfeydd o Northumbria yn hyfryd a Brenda ‘Pet’ Blethyn yn gysurus braf yn ei rôl a’i chot law Columbo-aidd o flêr. Dewis saffach, mwy canol y ffordd efallai. A draw ar S4C, mae aelod diweddaraf o’r genre CymruNoir, Craith wedi’i gosod ym Môn ac Arfon. Ditectif yn dychwelyd i’r ardal wed pwl o weithio i ffwrdd? Lot o olygfeydd o’r arfordir gwyllt a thyddynnod anghysbell? So far, so feri Y Gwyll. Ond fe ddwedodd Sioned Williams, adolygydd Barn a Dewi Llwyd ar Fore Sul y byddai hon yn apelio lot mwy na’r gyfres CardiNoir. Adolygiad i ddod...

Nos Lun – mae’r Silent Witness fytholwyrdd yn 21ain oed eleni ac yn ôl am gyfres newydd am batholegwyr honco bost sy’n anwybyddu pawb, yn dweud wrth blismyn beth i’w wneud ac yn cael eu hunain mewn sefyllfaoedd byw-neu-farw bob wythnos. Mae’n wfftio pob hygrededd ac yn llwyddo i ’nghorddi bob tro, ac eto, damia dw i’m cweit yn methu rhoi’r gora i weld beth wnaiff Dr Nikki Alexander (Emilia Fox) a’i chriw nesaf.

Nos Fercher - mae unrhyw beth gyda Sarah Lancashire yn werth son amdano, a byth ers dwy gyfres ysgubol o Happy Valley (gweler hefyd Mr James Norton), hi yw fy hoff actores Saesneg. Heno, ar Channel 4, mae’n serennu fel gweithwraig gymdeithasol o Fryste sydd dan y lach cenedlaethol a’r wasg ddi-ildio wedi i ferch fach groenddu o’r enw Kiri sydd dan ei gofal fynd ar goll. Y cyfarwyddwr o fri, Euros Lyn (Y Llyfrgell, Sherlock, Broadchurch) sydd wrth y llyw, felly mae'n argoeli'n dda iawn iawn.

Gyda llaw, ffilmiwyd rhannau o’r ddrama yn y De-ddwyrain, ac fe gafodd ei chyllido gan Lywodraeth Cymru. Os felly, pam ddim mynnu mai Cymru ac nid Gwlad yr Haf ydi gwir leoliad y gyfres, fel rhan o amod gwariant Llywodraeth y Bae? Tydi Channel 4 ddim yn malio tatan am Gymru fel arall.